Listen and click on the missing word
أنا بحكي لك قصة: أمي كانت متدينة كثير
وفيه عائلة، بيت جداع، عندهم بنت صارت من شهود يهوه
Les Témoins de Jéhovah
بتروح من بيت لبيت بتجرب
تجيبهم ليصيروا شهود يهوه. وصلت لعندنا على البيت وأمي عرفتها
"تفضلي، اقعدي"
وهديك صارت تحكي لها على شهود يهوه وأمي تقول لها بس نحن يهود
وهديك تحكي لها كمان وأمي تقول لها بس نحن يهود
يعني صعب واحد يهودي
يترك دينه ويصير مو يهودي
"اليوم سرقت محلي"
سليم ساسون عجمي
هرتسليا
يا ليل يا عين
اسمي سليم سليم شلومو عجمي
سليم الأول كان ملك كبير معروف بأيام العثمانيين. منشان هيك
سموني سليم على اسم الملك، السلطان سليم. أنا ولدت في حلب
سنة 1933
نحن هربنا من حلب، ما تركنا حلب. سنة 1947
تسعة وعشرين نوفمبر، في الأمم المتحدة قرروا انه يصير فيه دولة بإسرائيل
صار في مظاهرات في سوريا
والمظاهرات مش ضد اليهود ضد الصهيونيين
ما قالوا ضد اليهود، قالوا ضد الصهيونيين
وهالمظاهرات الحكومة السورية قامت فيها
دعمتها يعني
هي اللي دعمت المظاهرات
جيراننا إسلام كنا صحاب معهم
كل واحد على دينه الله يعينه هيك كانوا يقولوا، بس كانوا متعايشين
ولما كانت هذه المظاهرات انتم حسيتوا حالكم صهيونية؟
لما سمعت كلمه صهيوني انت حسيت حالك: أنا صهيوني؟
لا، نحن ما كنا صهيونيين أبداً. نحن كنا يهود
في حلب كان في يهود من زمان كثير
من أيام سيدنا أبراهام
بالعربي الفصيح حلب الشهباء
الشهباء يعني البيضاء
فيه جالية يهودية وفيه حارة اليهود
اليهود في حلب
قبل الإسلام وقبل المسيحية وحلب بالعبراني: آرام صوياة
مذكوره بالمزامير
أنا ما سكنت بحارة اليهود في حلب
سكنت في حلب الجديدة. الحارة اللي أنا سكنت فيها بيسموها الجميلية
على اسم جميل باشا
كنا نروح على الكنيس. كان فيه كم كنيس في حلب
أنا كنت أروح لكنيس تبع الجميلية والشماش (الشاويش)
أو شموش بيسموه حياه. كانوا يسموا الكنيس على اسمه كنيسة حياه
كمان كان فيه فرن يهودي كنا نشتري الخبز من عند فرن يهودي
لانه بيسوي حلاة
خبز السبت يعني الخاص؟
خبز على طول. الخبز بنشتري خبز من عند واحد يهودي
وصاحب الفرن اسمه تشرو. فرن تشرو. هاجر لأمريكا بعدين
اليوم ما عاد في حلب
يهود في حلب ما فيه
مدارس؟ أنا كنت في مدرسة اسمها تلمود توراة
ومدير تلمود التوراة كان اسمه فرج ساسون
لما حكوا انتم صهيونية انت حسيت انه المظاهرات ضدك؟
مع إنك مو صهيوني بس انت حسيت إنه المظاهرات موجهة لكم كيهود؟
لا، موجهة ضد إسرائيل
طيب ليش تركتوا سوريا إذاً؟
تركنا سوريا لأنه صاروا هالمظاهرات، وحرقوا الكنايس. مش حرقوا الكنايس
دخلوا على الكنايس وأخذوا المصاحف
حطوها بنصف الطريق وشعلوا فيها النار. خفنا
خفنا كثير لأنه سمعنا عن الحرب اللي صارت بأوروبا
بعد الحرب نحن سمعنا
الحرايق ذكرونا "كريستال ناخت" (ليلة الزجاج المكسور)
الحرايق اللي صارت في نورنبيرج (في ألمانيا)، وصار فيه خوف كبير
وتركوا سوريا، اليهود تركوا سوريا
في سوريا فيه بس إسلام. في لبنان كان فيه
ستعش سبتعش طائفة من أرثوذكسي لماروني
لدرزي، سنّي، شيعي، أرمني. غير حياة
لبنان كانت فيها حرية! منشان هيك تركنا سوريا
أبي كان صايغ. عنده محل في سوق الصياغين. يوم اللي صارت المظاهرات
وراح والدي مع شغّيل يشتغل عنده أرمني
على السوق اللي كان مسكر. دخل على المحل تبعه
اخذوا كل الصيغة اللي عنده اياها، وراحوا برّات السوق فيه بنك
استأجر صندوق حديد في بنك أودي روما وحط البضاعة
بصندوق الحديد. وأجى على البيت تعبان
وقال كلمة، جملة ما بننساها نحن في بيتنا:
"اليوم رحت سرقت محلي"
"دخلت على محلي مثل حرامي سرقت محلي"
وهذه كانت أول ديسمبر 1947
بثلاثة ديسمبر 1947 إجا تاكسي، شركة أرسان، أخذنا العائلة تبعنا
ورحنا لبيروت
وممثلكم كان فيه كثير يهود راحوا؟ تركوا؟
أكثر اليهود تركوا. فيه ناس كمان تركوا بالطيارة
طياره صغيرة من مطار النيرب. تركوا بالطيارة، اجوا لبيروت
كيف كانت الحياة في بيروت؟ كيف كان الانتقال لبيروت؟
بيروت عظيمة. نحن كنا بنعرف لبنان لأنه كنا بالصيف نجي نصيّف بلبنان
كل سنه كنا نجي نصيّف بلبنان. لبنان ما كانت غريبة علينا
نحن كنا كثير نجي نصيّف في لبنان. فيه ضيعة كانت اسمها فالوغة
وبعدين صرنا نصيّف في محلّ اسمه بحمدون وعاليه
في بحمدون وفي عاليه. والعيشة كانت عظيمة
عيشة لبنان، مش لبنان تبع اليوم
لبنان اللي أنا عم بحاكيك عليه، هذا كان لبنان العظيم. أحسن من
الريفييرا الفرنساوية
وفي بيروت وين سكنتوا؟ وين استقريتوا؟
سكنا مو بعيد عن الجامعة الامريكية. اليهود ما سكنوا في حارة اليهود
فيه حارة اليهود، وادي أبو جميل
بس أكثر اليهود سكنوا برّات، خارج وادي أبو جميل
وأبوك كان بيشتغل صائغ؟
أبوي كان بيشتغل صائغ وقت اللي انتقلنا للبنان
ابوي قال: بدي افتح محلّ وكان بدك تشتري خلو، بدك تدفع خلو
تاخذ محل في سوق الصياغين
وما كان فيه كثير يهود. بس بكل الصياغين كان في اثنين يهود
عائله الجاموس، بيت الجاموس
وزكي عجمي، زكي عجمي هو بيكون اخي
وكل الصياغين كانوا مسيحية أو أرمن
ما فيه إسلام صياغين أبداً
انت كنت شاب، انت كان عمرك 14-15 سنة لما وصلت لبيروت
لما وصلت لبيروت كان عمري 14 سنه ونصف
ووين رحت؟ لأي مدرسة؟
رحت ست شهور لمدرسة الأليانس. بعدين انتقلت لميسيون لايك أونيفيرسل
Mission Laïque
كيف كان الانتقال من مدرسة يهودية باللغة الفرنساوية لمدرسة مسيحية؟
أو على الأقل فرنساوية؟
أنا ما كنت أعرف فرنساوي أبداً
وقت اللي كنت بالأليانس ست شهور كنت أعرف عربي أكثر بكثير من فرنساوي
كانت حياة حلوة كثير. كانت حياة حلوة كثير
وكل عائلة كنا نروح
نصيّف في جبال لبنان ثلاث أشهر كل سنة
واللي عنده شغل
بينزل يشتغل بالبلد وبيطلع بعد الظهر
المسافة مش بعيدة، مسافة نص ساعة ثلاث أرباع ساعة بالأوتوموبيل
ابوك هيك كان بيعمل؟ ايه
انت تركت لبنان سنة 1958 وعمرك 25 سنة
ليش تركتوا لبنان؟
تركت لبنان سنة 1958 لأنه في أيام كميل شمعون سكّرت البلد
كل يوم الساعة ستة بعد الظهر
لستة ع بكير مسكّرة البلد. ما بيصير واحد يتجول! منع تجول
كانت حرب أهلية ضد كميل شمعون
شلون كانت الحياة اليهودية في لبنان؟ كانت فيه حياة يهودية ببيروت؟
أكيدا حياة يهودية
كان في كنيس مشهورة اسمها كنيس ماغين أبراهام. كثير مشهورة
ورغم انه اليهود تركوا لبنان على الخالص، بس الحكومة
خلت كنيس ماغين أبراهام بصورة محترمة. كثير بيعتنوا فيها
وهذه الماغين أبراهام كانت هدية
من ساسون، اللي بعث 50 ليرة ذهب بهذيك الأيام
حتى يعمروا كنيس على اسمه
لبنان كدولة عانى كثير حروب