Listen and click on the missing word
الحاخام إيلي عبادي
الحاخام الأكبر للجالية اليهودية هنا في دبي وفي الإمارات
مرحبا
مرحبتين صباح الخير
أهلا وسهلا
إحنا هون في المعبد اليهودي
في منطقة جميرا في دبي
واسم المعبد بوابات الشرق
لشو بيرمز يعني هاد الاسم؟
إلو معنى رمزي يعني
مو بس المعبد اسمو بوابات الشرق
الجالية كلا سميناها بوابات الشرق
والاسم فيه كم معنى الاسم
معنى أول إنو نحن قاعدين بالشرق
بالدنيا كلا هون الشرق أولاً
وثانياً اليهود دايماً كنا
الساكنين بأمريكا وبالغرب
بس بدنا نصلي منصلّي دايماً عالشرق
مشان هي فين القدس قاعدة
ومعنى تالت إنو بوابات الشرق
بالبيت المقدس المسكرين
نحن منآمن بس ما يجي المشيح
بدو يفوت مع النبي إلياهو
بيفوت من بوابات الشرق
بقا هول بوابات الشرق
يعني اسم ممتاز كتير كتير وعندو معنى حلو كتير
جميل
الجالية اليهودية أو الوجود اليهودي هون في دبي وفي الإمارات
شي جديد وشي خاص واستثنائي
يعني أنا بعتقد سمعت إنو هاي الجالية الوحيدة في العالم العربي
اللي عم تكبر مو عم تتقلص يعني
فـ يعني إنت بوقت تاريخي هون
احكيلنا شوي عن الجالية يعني والوجود اليهودي هون
أكيد هون كان في يهود قبل اتفاقات إبراهيم
بس ما كانت جالية مزبطة ومنظمة
بعد اتفاقات إبراهيم حتى الحكومة والشعب هون
بدن يكون عندن جالية يهودية منظمة ومع رخصة وكل شي
بقا طلبوني شي أنا كنت زرت هون من تلات سنين
زرت أول شي الجالية الصغيرة اللي كانت قاعدة هون
بعدين كمان زرنا مع صاحب السمو الشيخ محمد بن زايد
زرناه بالقصر تبعو بأبو ظبي وجبنالو سفر توراة
هدية على روح أبوه الشيخ زايد الله يرحمو
وتعرفت عالحكومة تعرفت عالناس تعرفت عالجالية
وبس ما صار اتفاقات إبراهيم وبدن يعملوا إنو جالية تكون منظمة مع رخصة
يعني جالية رسمية كدين كدين اليهودي
طلبوني إجي لهون مشان أنا أصلي من الشرق الأوسط
بحكي عربي
بعرف القرآن الدين الإسلام
وكنت معلم بيشيفا يونيفرسيتي
على أيام الوقت اللي كانوا اليهود والإسلام مع بعض ساكنين
اللي هي جامعة يهودية أمريكية في نيويورك صح؟
أيوا جامعة يهودية جامعة يشيفا يونيفرسيتي
أنا كنت مدير المدرسة تبع يعقوب صفرا
للعلماء السفارديين والشرقيين
طيب إحنا الآن فبراير 2022 إنت موجود هون من إيمتى إجيت؟
هلا موجود هون من نوفمبر من عام 2020
يعني إلي سنة وأربع تشهر
المستمعين والمشاهدين أكيد بيسمعوا إنو لهجتك سورية
فخلينا نحكي شوي عن سيرتك الشخصية يعني مواليد وين وكيف الحياة؟
كيف لكان أنا انولدت ببيروت بلبنان
أهلي كانوا لاجئين يهود سوريين
اللي هربوا من سوريا سنة الـ 48